मुंबई: रिपब्लिकन सेनेचे अध्यक्ष आनंदराज आंबेडकर यांच्या सासूबाई प्रेमाआई पांडुरंग साळवी यांचे आज, बुधवार (१० डिसेंबर २०२५) रोजी मुंबई येथे वृद्धापकाळाने निधन झाले. त्यांच्या निधनामुळे आंबेडकर आणि साळवी कुटुंबियांवर तसेच अनुयायांवर शोककळा पसरली आहे.
मिळालेल्या माहितीनुसार, प्रेमाआई पांडुरंग साळवी या आंबेडकरी चळवळीतील एक आधारस्तंभ म्हणून ओळखल्या जात होत्या. त्या आनंदराज आंबेडकर यांच्या पत्नी, मणीषाताई आंबेडकर यांच्या मातोश्री होत्या. सामाजिक आणि कौटुंबिक जीवनात दिलेले त्यांचे योगदान अविस्मरणीय राहील.
मान्यवरांची उपस्थिती आणि आदरांजली
प्रेमाआई पांडुरंग साळवी यांच्या पार्थिवावर आज मुंबईत अंत्यसंस्कार करण्यात आले. यावेळी महाराष्ट्रातील प्रमुख राजकीय आणि सामाजिक क्षेत्रातील अनेक मान्यवरांनी उपस्थिती लावून श्रद्धांजली अर्पण केली.
यावेळी वंचित बहुजन आघाडीचे राष्ट्रीय अध्यक्ष बाळासाहेब आंबेडकर, भीमराव आंबेडकर, रमा आनंद तेलतुंबडे, रिपब्लिकन सेनेचे अध्यक्ष आनंदराज आंबेडकर आणि समस्त आंबेडकर कुटुंबीय उपस्थित होते. या सर्व मान्यवरांनी प्रेमाआई पांडुरंग साळवी यांच्या स्मृतीस विनम्र आदरांजली अर्पण केली. त्यांच्या निधनाने आंबेडकरी चळवळीतील एका पिढीचा आधारस्तंभ हरपल्याची शोकभावना अनेक कार्यकर्त्यांनी व्यक्त केली आहे.
