आरक्षण उपवर्गीकरण निर्णय रद्द करा; दिंद्रुडमध्ये आंबेडकरी जनतेचा भव्य एल्गार मोर्चा

दिंद्रुड (प्रतिनिधी):

महाराष्ट्र शासनाच्या अनुसूचित जाती (SC) आरक्षण उपवर्गीकरणाच्या भूमिकेविरोधात बीड जिल्ह्यातील धारूर व माजलगाव तालुक्यातील आंबेडकरी जनतेच्या वतीने मंगळवारी दिंद्रुड येथे एक भव्य मोर्चा आणि एल्गार सभेचे आयोजन करण्यात आले होते. “आरक्षणाला लागलेला धक्का सहन केला जाणार नाही,” असा एकमुखी निर्धार करत हजारो आंदोलकांनी शासनाच्या या धोरणाचा तीव्र निषेध केला. ‘अनुसूचित जाती आरक्षण उपवर्गीकरण विरोधी कृती समिती’च्या वतीने या भव्य आंदोलनाचे आयोजन करण्यात आले होते.

​हजारो अबालवृद्धांचा उत्स्फूर्त सहभाग

​मंगळवारी सकाळी दिंद्रुड येथील प्रमुख मार्गावरून या भव्य मोर्चाला सुरुवात झाली. हातात निळे झेंडे आणि आरक्षण उपवर्गीकरणाच्या विरोधातील फलक घेऊन धारूर आणि माजलगाव तालुक्यातील हजारो महिला, पुरुष, युवक, तरुणी आणि वृद्ध या मोर्चात सहभागी झाले होते. कडक उन्हाची तमा न बाळगता आंदोलकांनी महाराष्ट्र शासनाच्या भूमिकेविरोधात जोरदार घोषणाबाजी केली. संपूर्ण दिंद्रुड परिसर या घोषणाबाजीने दणाणून गेला होता. मुख्य मार्गावरून प्रवास केल्यानंतर या मोर्चाचे रूपांतर एका जाहीर एल्गार सभेत झाले, जी तब्बल साडेतीन तास चालली.

​प्रमुख नेत्यांची उपस्थिती व मार्गदर्शन

​या एल्गार सभेला जालना येथील उपवर्गीकरण विरोधी आंदोलनाच्या प्रमुख नेत्या रूक्मिणी लोंढे, भन्ते पय्यातीस, विजय साळवे, सचिन उजगरे यांच्यासह बीड, जालना आणि लातूर जिल्ह्यातील प्रमुख आंबेडकरी नेत्यांची उपस्थिती होती.

​यावेळी बोलताना वक्त्यांनी ठाम मागणी केली की, “भारतीय संविधानाने अनुसूचित जातींना दिलेल्या आरक्षणाच्या मूळ अधिकाराला धक्का पोहोचवणारे कोणतेही पाऊल शासनाने उचलू नये. आरक्षणाचे उपवर्गीकरण करण्याचा निर्णय शासनाने तातडीने मागे घ्यावा, अन्यथा हे आंदोलन अधिक तीव्र केले जाईल.”

​”महार व मातंग समाजात तेढ निर्माण करण्याचा सरकारचा डाव”

​सभेतील मान्यवर वक्त्यांनी आपल्या भाषणातून सत्ताधाऱ्यांवर कडक शब्दांत टीका केली. महाराष्ट्र शासन आरक्षण उपवर्गीकरणाच्या (अ, ब, क, ड विभागणी) माध्यमातून अनुसूचित जातीतील महत्त्वाचे घटक असलेल्या महार व मातंग समाजात जाणीवपूर्वक तेढ आणि फूट निर्माण करण्याचा प्रयत्न करत असल्याचा आरोप यावेळी करण्यात आला. तसेच, मातंग समाजातील काही नेते सध्या सत्ताधाऱ्यांच्या प्रभावाखाली राहून मूळ अनुसूचित जातीतील जनतेची दिशाभूल करत आहेत, अशी खंतही वक्त्यांनी व्यक्त केली. परंतु, शासनाचा हा समाजात फूट पाडण्याचा मनसुबा कोणत्याही परिस्थितीत यशस्वी होऊ दिला जाणार नाही, असा सज्जड दम आंदोलकांनी दिला.

​नियोजनबद्ध आंदोलन

​या संपूर्ण मोर्चाचे व सभेचे यशस्वी आयोजन अनुसूचित जाती आरक्षण उपवर्गीकरण विरोधी कृती समितीचे अध्यक्ष सिद्धार्थ मायंदळे यांच्या नेतृत्वाखाली करण्यात आले होते. आंदोलन शांततेत आणि नियोजनबद्ध रीतीने पार पाडण्यासाठी कृती समितीचे पदाधिकारी विलास शिंदे, वामन पाईक, रानबा उजगरे, डॉ. संजय नाकलगावकर, इंजि. प्रशांत उघडे आदींनी विशेष परिश्रम घेतले. कडक ऊन असतानाही हजारो नागरिकांनी सभेला शेवटपर्यंत हजेरी लावून या आंदोलनाला आपला भक्कम पाठिंबा दर्शविला.