बीड :
शाळेच्या वेळेत बाह्य व्यक्तींकडून विविध कारणांवरून केले जाणारे व्हिडिओ चित्रीकरण आणि फोटोग्राफीमुळे विद्यार्थ्यांच्या अध्ययनात अडथळा निर्माण होत असल्याचे समोर आले आहे. या पार्श्वभूमीवर, शाळेच्या वेळेत कोणत्याही बाहेरील व्यक्तीस शाळेच्या आवारात व्हिडिओ किंवा फोटो काढण्यास सक्त मनाई करण्यात आली असून, मुख्याध्यापकांनी यासाठी परवानगी देऊ नये, असे स्पष्ट निर्देश बीड पंचायत समितीच्या गट शिक्षणाधिकारी प्रणिता गंगाखेडकर यांनी दिले आहेत.
जिल्हा परिषदेच्या मुख्य कार्यकारी अधिकाऱ्यांच्या अध्यक्षतेखाली पार पडलेल्या तातडीच्या बैठकीतील सूचनेनुसार हे परिपत्रक जारी करण्यात आले आहे.
परिपत्रकातील ठळक बाबी:
चित्रीकरणास परवानगी नाकारण्याचे निर्देश: शाळाबाह्य व्यक्तींनी शाळेत येऊन व्हिडिओ किंवा फोटो काढण्यापूर्वी मुख्याध्यापकांची पूर्वपरवानगी घेणे आवश्यक आहे. मात्र, विद्यार्थ्यांच्या शैक्षणिक गुणवत्तेवर कोणताही विपरीत परिणाम होऊ नये म्हणून मुख्याध्यापकांनी शाळेच्या वेळेत अशी कोणतीही परवानगी देऊ नये.
नम्रपणे समज देण्याच्या सूचना: अशा व्यक्तींशी सौम्य व विनम्र शब्दांत संवाद साधून, त्यांना शाळेच्या वेळेव्यतिरिक्त उपस्थित राहण्याबाबत अवगत करावे.
ग्रामस्थ व समितीचे सहकार्य: शाळेचे दैनंदिन शैक्षणिक कामकाज सुरळीत व अबाधितपणे पार पाडण्यासाठी शाळा व्यवस्थापन समिती (SMC), गावचे सरपंच आणि स्थानिक शिक्षणप्रेमींचे सहकार्य घ्यावे.
केंद्र प्रमुखांवर जबाबदारी: बीड तालुक्यातील सर्व व्यवस्थापनांच्या व सर्व माध्यमांच्या शाळांमध्ये या नियमांचे काटेकोर पालन होत असल्याची खात्री करण्याची सर्वस्वी जबाबदारी संबंधित केंद्र प्रमुखांवर सोपवण्यात आली आहे.
या निर्णयामुळे शाळेतील शैक्षणिक वातावरण सुरक्षित व शांत राहून शिक्षकांना अध्यापनावर पूर्ण लक्ष केंद्रित करता येईल, असा विश्वास व्यक्त करण्यात येत आहे.
