केज (बीड) | प्रतिनिधी
केज तालुक्यातील कुंबेफळ येथील सिद्धिविनायक विद्यालयात सहशिक्षक म्हणून कार्यरत असलेल्या सूर्यकांत वाघमारे यांच्या आत्महत्येप्रकरणी आता गंभीर आरोप समोर आले आहेत. वाघमारे यांना हनीट्रॅपमध्ये अडकवून ब्लॅकमेल करण्यात आल्याचा आरोप त्यांच्या कुटुंबीयांनी केला आहे. या प्रकरणातील संशयितांविरुद्ध गुन्हा दाखल करून कठोर कारवाई करावी, या मागणीसाठी मृत शिक्षकाचे बंधू संदीप वाघमारे यांनी १५ ऑगस्ट रोजी बीड जिल्हाधिकारी कार्यालयासमोर आत्मदहनाचा प्रयत्न केला.
नेमके प्रकरण काय?
सूर्यकांत वाघमारे यांनी ९ जून रोजी केज-कळंब रस्त्यावरील कमल पेट्रोल पंपाजवळील एका शेतातील लिंबाच्या झाडाला गळफास घेऊन आत्महत्या केली होती. त्यांच्या पश्चात पत्नी व दोन मुले असा परिवार आहे. पत्नी महसूल विभागात ग्राम महसूल अधिकारी म्हणून कार्यरत असल्याची माहिती आहे. या घटनेनंतर केज पोलीस ठाण्यात अकस्मात मृत्यूची नोंद करण्यात आली होती.
हनीट्रॅप आणि ब्लॅकमेलिंगचा आरोप
मृत शिक्षकाचे बंधू संदीप वाघमारे यांच्या म्हणण्यानुसार, नातेवाईक व मित्रांकडून मिळालेल्या माहितीतून सूर्यकांत वाघमारे यांना एका नातेवाईक महिलेने कथितरित्या हनीट्रॅपमध्ये अडकवले असल्याचे समोर आले. संबंधित महिला, तिचा पती आणि दीर यांनी फोन करून खोट्या गुन्ह्यात अडकवण्याची, बदनामी करण्याची तसेच जीवे मारण्याची धमकी दिल्याचा आरोप कुटुंबीयांनी केला आहे.
कुटुंबीयांच्या म्हणण्यानुसार, संबंधित महिलेने पाठवलेले आक्षेपार्ह फोटो, चॅटिंग तसेच तिच्या पतीने दिलेल्या कथित धमकीवजा ऑडिओ रेकॉर्डिंगसह काही पुरावे पोलिसांकडे सादर करण्यात आले आहेत.
कारवाईच्या मागणीसाठी आत्मदहनाचा प्रयत्न
पुरावे सादर करूनही संबंधितांविरुद्ध गुन्हा दाखल झाला नसल्याचा आरोप करत संदीप वाघमारे यांनी १५ ऑगस्ट रोजी बीड जिल्हाधिकारी कार्यालयासमोर अंगावर ज्वलनशील पदार्थ ओतून आत्मदहन करण्याचा प्रयत्न केला. उपस्थित पोलिसांनी वेळीच हस्तक्षेप करून त्यांना ताब्यात घेतल्याने मोठा अनर्थ टळला.
या घटनेनंतर संबंधित प्रकरणाच्या तपासाबाबत प्रश्न उपस्थित होत असून, कुटुंबीयांनी संशयितांविरुद्ध तातडीने गुन्हा दाखल करून निष्पक्ष तपास करावा आणि दोषी आढळणाऱ्यांवर कठोर कारवाई करावी, अशी मागणी केली आहे.
टीप : हनीट्रॅप, ब्लॅकमेलिंग आणि धमकीचे आरोप हे कुटुंबीयांनी केलेले आरोप आहेत. या आरोपांची सत्यता तपासातून स्पष्ट होणे अपेक्षित असून, संबंधित व्यक्तींना दोषी ठरविण्याचा अंतिम अधिकार तपास यंत्रणा व न्यायालयाचा आहे.
लाईव्ह अशोका टाईम्स न्यूज
सत्याचा आवाज, जनतेची ताकद
