हिंगोली/अमरावती:
महाराष्ट्राच्या राजकारणात सध्या ‘वंचित बहुजन आघाडी’च्या (VBA) वाढत्या प्रभावाची चर्चा जोर धरू लागली आहे. नुकत्याच जाहीर झालेल्या नगरपालिका निवडणुकीच्या निकालांनी सर्वांचे लक्ष वेधून घेतले आहे. प्रस्थापित राजकीय पक्षांच्या धनशक्तीला आणि जातीपातीच्या समीकरणांना छेद देत, बाळासाहेब आंबेडकर यांच्या नेतृत्वाखाली वंचित समूहातील उमेदवारांनी ऐतिहासिक विजय मिळवत एक नवी सुरुवात केली आहे.
उपेक्षित जातींना सत्तेचा मान
या निवडणुकीचे सर्वात मोठे वैशिष्ट्य म्हणजे अशा समाजातील प्रतिनिधी निवडून आले आहेत, जे आजवर सत्तेच्या परिघाबाहेर होते.
हिंगोलीत वैदू समाजाच्या कार्यकर्त्याने विजय मिळवला आहे.
जामखेडमध्ये कोल्हाटी समाजाचा कार्यकर्ता नगरसेवक म्हणून निवडून आला आहे.
चांदूर रेल्वे (अमरावती) येथे सुतार समाजाच्या महिलेने थेट ‘नगराध्यक्ष’ पदावर नाव कोरून सर्वांना थक्क केले आहे.
’सतरंजी उचलणाऱ्यांच्या हाती सत्तेची चावी’
”ज्यांनी आजवर केवळ प्रस्थापितांच्या दारात सतरंज्या उचलल्या, त्यांना सत्तेच्या खुर्चीवर बसवणे हेच आमचे ध्येय आहे,” असे बाळासाहेब आंबेडकरांचे विचार या निकालांतून सत्यात उतरताना दिसत आहेत. केवळ घोषणाबाजी न करता, एससी, एसटी, भटके, ओबीसी आणि मायक्रो-ओबीसी समूहांना राजकीय आत्मभान देण्याचे काम वंचितने केल्याचे या विजयातून स्पष्ट झाले आहे.
आंबेडकर कुटुंबीयांची मैदानात आघाडी
पक्षाच्या या यशामागे बाळासाहेब आंबेडकर यांच्या दूरदृष्टीसोबतच, प्रा. अंजलीताई आंबेडकर आणि युवा नेते सुजात दादा आंबेडकर यांची मोठी मेहनत दिसून येत आहे. सुजात दादा आंबेडकर यांनी महाराष्ट्र पिंजून काढत तरुणांना संघटित केले, ज्याचा थेट फायदा निवडणुकीत झाला. विरोधकांकडून केल्या जाणाऱ्या ‘बी-टीम’च्या आरोपांना मतदारांनी चोख प्रत्युत्तर दिल्याचे समर्थकांचे म्हणणे आहे.
एक नवा राजकीय पर्याय
”भीक नको सत्तेची, सत्ता हवी हक्काची” ही घोषणा आता केवळ कागदावर राहिलेली नसून, ती जमिनीवर उतरली आहे. आगामी महानगरपालिकेत आणि जिल्हापरिषद निवडणुकीत हाच ‘वंचित पॅटर्न’ प्रस्थापितांच्या छावणीत धडकी भरवणार, अशी चर्चा राजकीय वर्तुळात रंगली आहे
