मुंबई:
राज्यात निर्माण झालेल्या गॅस सिलेंडरच्या तीव्र टंचाईमुळे सर्वसामान्य नागरिक त्रस्त झाले असून, या प्रश्नाकडे सरकारचे लक्ष वेधण्यासाठी वंचित बहुजन आघाडीने आज (६ एप्रिल २०२६) महाराष्ट्रभर आक्रमक आंदोलन केले. ‘नरेंदर, कब मिलेंगा गॅस सिलेंडर?’ या मुख्य घोषणेसह राज्यभरातील जिल्हा आणि तालुका स्तरावर हे आंदोलन पुकारण्यात आले होते.
गेल्या काही दिवसांपासून गॅस सिलेंडरचा पुरवठा विस्कळीत झाल्यामुळे गृहिणींचे आणि सामान्य कुटुंबांचे दैनंदिन बजेट कोलमडले आहे. अनेक ठिकाणी बुकिंग करूनही वेळेवर सिलेंडर मिळत नसल्याने नागरिकांमध्ये तीव्र संतापाची भावना आहे. याच मुद्द्याला वाचा फोडत, वंचित बहुजन आघाडीच्या कार्यकर्त्यांनी सरकारविरोधात घोषणाबाजी केली.
आंदोलनातील प्रमुख मागण्या:
पुरवठा सुरळीत करणे: गॅस सिलेंडरचा विस्कळीत झालेला पुरवठा त्वरित पूर्ववत करावा.
काळाबाजार रोखणे: टंचाईचा फायदा घेऊन सुरू असलेला गॅसचा काळाबाजार तातडीने बंद करावा.
नागरिकांची गैरसोय दूर करा: महागाई आणि टंचाईच्या कात्रीत सापडलेल्या सामान्य जनतेला दिलासा द्यावा.
राज्यभरात विविध ठिकाणी या आंदोलनात वंचित बहुजन आघाडीचे स्थानिक पदाधिकारी, कार्यकर्ते आणि मोठ्या संख्येने सामान्य नागरिक सहभागी झाले होते. प्रशासनाने यावर तातडीने तोडगा न काढल्यास येणाऱ्या काळात तीव्र आंदोलन छेडण्याचा इशाराही यावेळी देण्यात आला आहे.
