केज | प्रतिनिधी,
केज शहरात येत्या मार्च महिन्यात धार्मिक उत्सवाचा मोठा सोहळा रंगणार आहे. बीड रोडवरील भगवान श्रीकृष्ण आश्रम येथे श्रीकृष्ण मंदिर भूमिपूजन, भव्य महाविष्णूयाग (यज्ञ) आणि महाराष्ट्रातील सुप्रसिद्ध रामायणाचार्य ह.भ.प. रामराव महाराज ढोक यांच्या संगीतमय रामकथा व कीर्तन महोत्सवाचे आयोजन करण्यात आले आहे. ११ मार्च ते १९ मार्च २०२६ या कालावधीत हा भक्तिसोहळा पार पडणार आहे.
भागवत भूषण ह.भ.प. केशव महाराज शास्त्री (भगवान श्रीकृष्ण आश्रम, केज) यांच्या संकल्पनेतून आणि मार्गदर्शनाखाली हा महायज्ञ होत आहे. हिमालयातील महान तपस्वी ऋषी-मुनींच्या प्राचीन साधना परंपरेनुसार हा याग संपन्न होणार असून, सकल विश्वाचे कल्याण, सुख-शांती, समृद्धी आणि आध्यात्मिक उन्नती हा यामागचा मुख्य उद्देश असल्याचे केशव महाराज शास्त्री यांनी प्रसिद्धी माध्यमांशी बोलताना सांगितले.
असे असेल कार्यक्रमाचे स्वरूप:
या सोहळ्याचा प्रारंभ बुधवार, ११ मार्च २०२६ रोजी होईल. उत्सवाच्या काळात दररोज सकाळी ८:०० ते ११:०० या वेळेत तज्ज्ञ पुरोहितांच्या मंत्रोच्चारात यज्ञविधी पार पडतील. तर दररोज सायंकाळी ८:०० ते १०:०० या वेळेत ह.भ.प. रामराव महाराज ढोक यांची सुमधुर संगीतमय रामकथा व कीर्तन सोहळा रंगणार आहे. गुरुवार, १९ मार्च २०२६ रोजी या भव्य सोहळ्याची सांगता होईल.
भाविकांना नाव नोंदणीचे आवाहन:
या महायज्ञात सहभागी होण्यासाठी भाविकांनी आपली नावे श्रीकृष्ण आश्रमात लवकरात लवकर नोंदवावीत, असे आवाहन आयोजकांच्या वतीने करण्यात आले आहे. केज शहर आणि परिसरातील भाविकांमध्ये या भव्य आयोजनामुळे उत्साहाचे आणि मांगल्याचे वातावरण निर्माण झाले आहे. या धार्मिक महोत्सवाचा आणि महाविष्णू यागाचा लाभ सर्व भाविकांनी घ्यावा, असे आवाहन ह.भ.प. केशव महाराज शास्त्री व श्रीकृष्ण आश्रम परिवाराने केले आहे.
