केज (प्रतिनिधी):
ग्रामीण भागातील विद्यार्थ्यांच्या शिक्षणाला बळ मिळावे आणि त्यांच्या स्वप्नांना पंख मिळावे, या उदात्त हेतूने पुणे येथील स्नेहछाया परिवार सामाजिक संस्थेच्या वतीने बीड जिल्ह्यातील केज तालुक्यातील जिल्हा परिषद प्राथमिक शाळा, गोटेगाव येथे शालेय साहित्याचे वाटप करण्यात आले.
विद्यार्थ्यांच्या चेहऱ्यावर उमटले हास्य
गरजवंत विद्यार्थ्यांना वह्या, पेन, दप्तर आणि इतर आवश्यक शैक्षणिक साहित्याचे वाटप यावेळी करण्यात आले. ग्रामीण भागात काम करणाऱ्या जिल्हा परिषद शाळांमधील गुणवंत विद्यार्थ्यांना अशा स्वरूपाची मदत मिळाल्याने विद्यार्थ्यांसह पालकांनीही समाधान व्यक्त केले आहे. स्नेहछाया परिवाराने सामाजिक बांधिलकी जपत पुण्याहून थेट बीडच्या दुष्काळी भागात मदतीचा हात पुढे केल्याने सर्वत्र त्यांचे कौतुक होत आहे.
मान्यवरांची उपस्थिती
हा कार्यक्रम शाळेच्या प्रांगणात उत्साहात पार पडला. यावेळी विद्यार्थ्यांचे मार्गदर्शक आणि शिक्षक मोहिते सर, चव्हाण मॅडम व पवार सर यांची प्रमुख उपस्थिती होती. शिक्षकांनी या उपक्रमाबद्दल बोलताना सांगितले की, “अशा सामाजिक उपक्रमांमुळे मुलांमध्ये शिक्षणाची गोडी निर्माण होते आणि त्यांना आपणही समाजात महत्त्वाचे आहोत याची जाणीव होते.”
याप्रसंगी सम्यक विद्यार्थी आंदोलन व वंचित बहुजन आघाडीचे सक्रिय कार्यकर्ते अक्षय बचुटे (गोटेगावकर) यांनी विशेष पुढाकार घेतला. त्यांच्या उपस्थितीमुळे कार्यक्रमाला सामाजिक चळवळीची साथ लाभली. अक्षय बचुटे यांनी आपल्या मनोगतातून विद्यार्थ्यांच्या प्रगतीसाठी अशा उपक्रमांची गरज सातत्याने भासणार असल्याचे नमूद केले.
सामाजिक बांधिलकीचा आदर्श
स्नेहछाया परिवार, पुणे यांच्या या उपक्रमाने समाजासमोर एक आदर्श निर्माण केला आहे. केवळ शहरांपुरते मर्यादित न राहता ग्रामीण भागातील जिल्हा परिषद शाळांपर्यंत पोहोचून तेथील मूलभूत गरजा पूर्ण करण्याचा संस्थेचा हा प्रयत्न कौतुकास्पद ठरला आहे.
या कार्यक्रमाच्या यशस्वीतेसाठी गोटेगाव येथील ग्रामस्थ, शाळेचे कर्मचारी आणि स्वयंसेवकांनी मोलाचे सहकार्य केले.
