केज | प्रतिनिधी
‘जय भवानी, जय शिवाजी’च्या जयघोषाने आज केज शहराचा कानाकोपरा दुमदुमून गेला. छत्रपती शिवाजी महाराज यांच्या जयंतीनिमित्त शहरात अभूतपूर्व उत्साह पाहायला मिळाला. पारंपारिक वाद्ये, लेझीम पथके आणि महिलांच्या उत्स्फूर्त सहभागामुळे संपूर्ण केज शहर शिवमय झाले होते.
डीजेला फाटा, संस्कृतीला मान
यंदाच्या मिरवणुकीचे सर्वात मोठे वैशिष्ट्य म्हणजे शिवप्रेमींनी डॉल्बीच्या कर्कश आवाजाला फाटा देऊन स्वतःहून बंदी घातली होती. ‘डीजे’च्या गोंगाटाऐवजी ढोल-ताशा आणि वासुदेव पथकांच्या गजराने शहरात एक वेगळेच नवचैतन्य पसरले होते. पारंपारिक संस्कृतीचे जतन करत काढण्यात आलेल्या या मिरवणुकीचे सर्वत्र कौतुक होत आहे.
रणरागिणींचा उत्स्फूर्त सहभाग
मिरवणुकीत महिलांचा सहभाग लक्षणीय होता. डोक्यावर भगवे फेटे बांधून मोठ्या संख्येने महिला या सोहळ्यात सामील झाल्या होत्या. महिलांच्या शिस्तबद्ध उपस्थितीने मिरवणुकीची शोभा अधिकच वाढवली.
रोषणाईचा झगमगाट आणि जिवंत देखावे
केज शहरातील मुख्य छत्रपती शिवाजी महाराज चौक विविध रंगीबेरंगी रोषणाईने उजळून निघाला होता. विविध सार्वजनिक मंडळांनी सादर केलेले ऐतिहासिक जिवंत देखावे आणि सांस्कृतिक कार्यक्रमांनी यंदाच्या शिवजयंती उत्सवात विशेष रंगत भरली. हा नयनरम्य सोहळा पाहण्यासाठी नागरिकांनी मोठी गर्दी केली होती.
प्रशासनाचे नियोजन आणि पोलीस बंदोबस्त
मिरवणूक मार्गभर शिवप्रेमींकडून पिण्याच्या पाण्याच्या बाटल्या आणि फराळाचे वाटप करण्यात आले. अत्यंत शिस्तबद्ध पद्धतीने आणि शांततेत ही मिरवणूक पार पडली. कोणताही अनुचित प्रकार टाळण्यासाठी पोलीस निरीक्षक स्वप्नील उनवणे यांच्या मार्गदर्शनाखाली केज पोलिसांनी चोख बंदोबस्त तैनात केला होता.
