संभाजीनगर(औरंगाबाद): वंचित बहुजन आघाडीचे (VBA) राष्ट्रीय अध्यक्ष बाळासाहेब आंबेडकर यांच्याबद्दल एका फेसबुक पेजवर आक्षेपार्ह आणि जातीयवादी टिप्पणी असलेला व्हिडिओ पोस्ट केल्याप्रकरणी, वंचित बहुजन आघाडीने कठोर कारवाईची मागणी केली आहे. युवा शहर अध्यक्ष संदीप रतन जाधव यांनी औरंगाबाद येथील पोलीस निरीक्षक (गुन्हे शाखा) यांच्याकडे याबाबत लेखी तक्रार दाखल केली आहे.
नेमका काय आहे प्रकार?
’राजकारण विदर्भाचे’ नावाच्या फेसबुक पेजवरून हा आक्षेपार्ह व्हिडिओ सोशल मीडियावर पोस्ट करण्यात आला असल्याचा आरोप करण्यात आला आहे.
मिळालेल्या माहितीनुसार, २४ ऑक्टोबर २०२५ रोजी वंचित बहुजन आघाडीच्या वतीने औरंगाबाद जिल्ह्यात राष्ट्रीय स्वयंसेवक संघाच्या (RSS) कार्यालयावर जनआंदोलन मोर्चा काढण्यात आला होता. या घटनेनंतर सामाजिक तेढ निर्माण करण्याच्या हेतूने हा आक्षेपार्ह व्हिडिओ तयार करून पोस्ट करण्यात आला, असे तक्रारीत नमूद आहे.
आक्षेपार्ह मजकूर आणि मागणी
वंचित बहुजन आघाडीचे जिल्हा निरीक्षक योगेश बन यांना आलेल्या एका लिंकमध्ये हा व्हिडिओ होता. या व्हिडिओमध्ये बाळासाहेब आंबेडकर यांच्याबाबत आक्षेपार्ह जातीवाचक शब्दांचा प्रयोग करण्यात आला आहे. तसेच, व्हिडिओत ‘प्रकाश आंबेडकर एक्सपोज सिरीजच्या पहिल्या भागात’ असा उल्लेख आहे. हे कृत्य मानहानीकारक असून सामाजिक सलोखा बिघडवणारे असल्याचे VBA ने म्हटले आहे.
संदीप रतन जाधव यांनी ‘राजकारण विदर्भाचे’ या फेसबुक ग्रुपच्या सर्व ॲडमिन (प्रशासक) तसेच व्हिडिओशी संबंधित सर्व व्यक्तींवर त्वरित गुन्हा नोंदवावा, अशी मागणी केली आहे.
गुन्हा दाखल करण्यासाठी माहिती तंत्रज्ञान अधिनियम (Information Technology Act) आणि ॲट्रॉसिटी कायद्यांतर्गत (Atrocities Act) कायदेशीर कलमांचा आधार घ्यावा, असे त्यांनी म्हटले आहे. या आक्षेपार्ह पोस्टमुळे समाजात कोणताही गैरसमज किंवा तणाव निर्माण होऊ नये यासाठी प्रशासनाने तातडीने पाऊले उचलावीत, अशी मागणी वंचित बहुजन आघाडीने केली आहे
