पुणे: शोषित आणि असंघटित कामगारांचे नेते, ज्येष्ठ सामाजिक कार्यकर्ते डॉ. बाबा आढाव यांचे आज रात्री पुण्यात वयाच्या ९५ व्या वर्षी निधन झाले.
आयुष्यभर ‘सत्य सुखाला आधार’ ही शिकवण जपत, त्यांनी हमाल, रिक्षाचालक, बांधकाम मजूर अशा लाखो असंघटित कामगारांना संघटित करून त्यांच्या हक्कांसाठी संघर्ष केला. वैद्यकीय सेवेतून समाजकार्यात आलेल्या डॉ. आढाव यांनी संयुक्त महाराष्ट्र चळवळ, धरणग्रस्तांचा लढा आणि ‘एक गाव, एक पाणवठा’ यांसारख्या पुरोगामी चळवळींमध्ये मोठे योगदान दिले. ते महात्मा फुले यांच्या सत्यशोधकी विचारांचे निष्ठावान पाईक होते आणि त्यांनी अंधश्रद्धा निर्मूलनासाठीही कार्य केले.
त्यांच्या निधनाने कष्टकरी समूहांवरील अन्याय दूर करण्यासाठी झटणाऱ्या एका समर्पित युगाचा आणि फुले-शाहू-आंबेडकरी चळवळीचा मोठा आधार हरपला आहे.
