पाली (प्रतिनिधी) – जि.प.के. प्राथमिक शाळा वांगी येथील मुख्याध्यापक सुभाष वीर सर यांची कन्या कुमारी साक्षी सुभाष वीर हिने वैद्यकीय क्षेत्रातील प्रतिष्ठित मानली जाणारी एमबीबीएस पदवी यशस्वीरीत्या संपादन करून आपल्या कुटुंबासह गावाचे नाव उज्ज्वल केले आहे. तिच्या या यशामुळे पालीसह संपूर्ण परिसरात अभिमानाचे व आनंदाचे वातावरण निर्माण झाले आहे.
लहानपणापासूनच अभ्यासू, जिद्दी आणि ध्येयवेडी असलेल्या साक्षीने शिक्षणाच्या प्रत्येक टप्प्यावर उत्कृष्ट कामगिरी करत आपली गुणवत्ता सिद्ध केली. वैद्यकीय क्षेत्रात प्रवेश मिळवणे हेच एक मोठे आव्हान असताना, त्या पुढील कठोर आणि दीर्घकालीन अभ्यासक्रम यशस्वीरीत्या पूर्ण करणे हे तिच्या चिकाटीचे द्योतक आहे. दिवस-रात्र परिश्रम, वेळेचे काटेकोर नियोजन आणि सातत्यपूर्ण अभ्यास यांच्या बळावर तिने हे यश मिळवले.
साक्षीच्या या यशामागे तिच्या कुटुंबियांचे, विशेषतः वडील श्री. सुभाष वीर सर यांचे मार्गदर्शन आणि आईचे प्रोत्साहन महत्त्वाचे ठरले. शिक्षक कुटुंबातील संस्कार आणि शिक्षणाविषयीची ओढ यामुळे तिला लहानपणापासूनच शिक्षणाची योग्य दिशा मिळाली.
वैद्यकीय पदवी प्राप्त केल्यानंतर समाजातील गरजू आणि वंचित घटकांना आरोग्य सेवा देण्याचे साक्षीचे स्वप्न असून, “रुग्णसेवा हीच खरी सेवा” या भावनेतून ती पुढे कार्य करणार असल्याचे सांगितले जाते. तिची ही जिद्द आणि सेवाभाव निश्चितच इतर विद्यार्थ्यांसाठी प्रेरणादायी ठरणार आहे.
तिच्या या उल्लेखनीय यशाबद्दल शिक्षकवर्ग, मित्रपरिवार, नातेवाईक तसेच ग्रामस्थांकडून अभिनंदनाचा वर्षाव होत आहे. विविध स्तरातून तिच्यावर शुभेच्छांचा वर्षाव होत असून, तिच्या पुढील वाटचालीसाठी सर्वजण मनःपूर्वक शुभेच्छा देत आहेत.
