मुंबई:लाईव्ह अशोका टाईम्स: महाराष्ट्राच्या राजकारणात आगामी काळात मोठ्या उलथापालथी होण्याचे संकेत मिळत आहेत. नवी दिल्ली येथून ॲड. बाळासाहेब आंबेडकर यांना आलेल्या एका महत्त्वपूर्ण फोननंतर हालचालींना वेग आला असून, आज काँग्रेसच्या एआयसीसी (AICC) शिष्टमंडळाने दादर येथील ‘राजगृह’ निवासस्थानी आंबेडकरांची भेट घेतली. या भेटीमुळे राज्याच्या राजकीय वर्तुळात चर्चेला उधाण आले आहे.
अर्धा तास बंद दाराआड चर्चा
काँग्रेसचे एआयसीसी सेक्रेटरी श्री. वेंकटेश आणि मुंबई काँग्रेसच्या काही प्रमुख पदाधिकाऱ्यांनी आज ॲड. बाळासाहेब आंबेडकर यांची भेट घेतली. यावेळी वंचित बहुजन आघाडीचे प्रदेश उपाध्यक्ष डॉ. धैर्यवर्धन पुंडकर, युवा नेते सुजात आंबेडकर आणि सुमित आनंद उपस्थित होते. विशेष म्हणजे, ॲड. आंबेडकर आणि श्री. वेंकटेश यांच्यात स्वतंत्र खोलीत सुमारे अर्धा तास सविस्तर चर्चा झाली.
काँग्रेसकडून ‘वंचित’ला प्रस्ताव
या बैठकीनंतर प्रसारमाध्यमांशी बोलताना डॉ. धैर्यवर्धन पुंडकर यांनी सांगितले की, “काँग्रेस पक्षाकडून वंचित बहुजन आघाडीला काही प्रस्ताव देण्यात आले आहेत. मात्र, हे प्रस्ताव आगामी स्थानिक स्वराज्य संस्थांच्या निवडणुकांसाठी आहेत की राष्ट्रीय पातळीवरील महाआघाडीसाठी, हे अद्याप स्पष्ट झालेले नाही.” या प्रस्तावावर ॲड. आंबेडकर योग्य वेळी आपली भूमिका जाहीर करतील, असेही त्यांनी नमूद केले.
’वंचित’शिवाय राजकारण अशक्य – डॉ. पुंडकर
काँग्रेसच्या या पुढाकारावर प्रतिक्रिया देताना डॉ. पुंडकर यांनी वंचितचे महत्त्व अधोरेखित केले. ते म्हणाले:
”भाजप आणि आरएसएसला पराभूत करायचे असेल, तर काँग्रेसला आता हे उमगले आहे की ते एकट्याने लढू शकत नाहीत. वंचित बहुजन आघाडी हा महाराष्ट्राच्या राजकारणाचा अपरिहार्य भाग आहे. तिच्याशिवाय राज्यात कोणतेही गैर-भाजप राजकारण टिकू शकत नाही.”
पुढील पाऊल:
ही भेट म्हणजे आगामी निवडणुकांमध्ये ‘वंचित’ आणि ‘काँग्रेस’ एकत्र येण्याची नांदी मानली जात आहे. आता बाळासाहेब आंबेडकर काँग्रेसच्या प्रस्तावावर काय निर्णय घेतात, याकडे संपूर्ण राज्याचे लक्ष लागले आहे.
