कोल्हापूर: महाराष्ट्र लोकसेवा आयोगाने (एमपीएससी) नुकताच जाहीर केलेल्या राज्यसेवा मुख्य परीक्षेच्या अंतिम निकालात कोल्हापूरच्या कन्येने आपला ठसा उमटवला आहे. कसबा बावड्यातील रहिवासी असलेल्या सायली किरण भोसले हिने या प्रतिष्ठित परीक्षेत अनुसूचित जाती (SC) प्रवर्गातील मुलींमध्ये राज्यात दुसरा क्रमांक पटकावला आहे. तिची निवड थेट राजपत्रित वर्ग 1 अधिकारी पदासाठी झाली असून, पोलीस उपअधीक्षक (DySP) हे पद मिळवण्याचे तिचे ध्येय आहे. तिच्या या ऐतिहासिक कामगिरीने कोल्हापूर जिल्ह्याचा मान वाढवला असून, असंख्य विद्यार्थ्यांना प्रेरणा मिळाली आहे.
शालेय जीवनातच ध्येय निश्चित:
नेजदार कॉलनी, कसबा बावडा येथे राहणाऱ्या सायलीचे वडील किरण भोसले हे सातारा जिल्ह्यातील तळबीड पोलीस ठाण्यात सहाय्यक पोलीस निरीक्षक (API) आहेत. आई गृहिणी असून, सायलीने कोल्हापूरमधील म. ल. ग. हायस्कूलमधून शिक्षण पूर्ण करून मुंबई विद्यापीठातून ईएनटीसी अभियांत्रिकीची पदवी घेतली.
सायलीने शालेय जीवनातच जिल्हाधिकारी कार्यालयाची इमारत पाहून प्रशासकीय अधिकारी होण्याचे स्वप्न पाहिले होते. “लोकांच्या कामी येणारा अधिकारी व्हायचं,” हे तिचे ध्येय होते. अभियांत्रिकीसारख्या तांत्रिक क्षेत्रातील पदवी घेतल्यानंतर प्रशासकीय सेवेकडे वळणे तिच्या ध्येयवेडेपणाचे द्योतक आहे.
परिश्रम आणि शिस्तीचा प्रवास:
सायलीने २०२० पासून राज्यसेवा परीक्षेची तयारी सुरू केली. पहिल्या प्रयत्नात यश थोडक्यात हुकले असले तरी, अपयशाने खचून न जाता दुसऱ्या प्रयत्नात तिने आत्मविश्वासाने बाजी मारली. रोज तब्बल १२ तास अभ्यासाचे ध्येय ठेऊन तिने स्वतःला तयार केले.
या प्रवासात तिने पुण्यातील इरा अकॅडमीचे संकल्प देशमुख यांच्या ऑनलाईन मार्गदर्शनाचा लाभ घेतला. तसेच जीएसटी विभागाचे अधिकारी एम.के. रणदिवे, पोलीस अधिकारी कृष्णात पिंगळे आणि डॉ. मयुरी गिल्डा यांचे मोलाचे मार्गदर्शन लाभले.
प्रेरणादायी आणि जल्लोषमय क्षण:
३० ऑक्टोबर रोजी निकाल जाहीर होताच कसबा बावड्यात आनंदाचा आणि अभिमानाचा माहोल पसरला. सायलीने भगवा चौकातील छत्रपती शिवाजी महाराजांच्या पुतळ्यास पुष्पहार अर्पण करून अभिवादन केले. तिच्या यशाबद्दल भगवा चौक ते नेजदार कॉलनी मार्गावरून काढण्यात आलेल्या जल्लोषमय मिरवणुकीत परिसरातील तरुण-तरुणी मोठ्या संख्येने सहभागी झाले होते. सायली भोसले यांचे हे यश केवळ त्यांच्या कुटुंबीयांसाठीच नव्हे, तर राज्यसेवा परीक्षेत यश संपादन करण्याचे स्वप्न पाहणाऱ्या प्रत्येक उमेदवारासाठी मेहनत, आत्मविश्वास आणि ध्येयनिष्ठा या त्रिसूत्रीच्या शक्तीची उत्तम साक्ष आहे.
