पुणे: महाराष्ट्रातून शिक्षण घेऊन आंतरराष्ट्रीय स्तरावर नोकरीची संधी मिळवलेल्या एका होतकरू दलित तरुणाला जातीय भेदभावामुळे आपली लंडनच्या हिथ्रो विमानतळावरील नोकरी गमवावी लागल्याची धक्कादायक घटना समोर आली आहे. पुणे येथील मॉडर्न कॉलेज ऑफ आर्ट्स, सायन्स अँड कॉमर्सने आवश्यक कागदपत्रे असतानाही, तरुणाचे शैक्षणिक प्रमाणपत्र तपासण्यास (verify) स्पष्टपणे नकार दिल्याने ही परिस्थिती उद्भवल्याचा आरोप वंचित बहुजन आघाडीचे प्रमुख ॲड. प्रकाश आंबेडकर यांनी केला आहे. *प्रमाणपत्र तपासणीस ‘जाती’मुळे नकार* प्रेम बिऱ्हाडे, असे या तरुणाचे नाव असून, तो नंदुरबारसारख्या आदिवासी भागातून येऊन ससेक्स विद्यापीठातून नुकताच पदवीधर झाला आहे. त्याला लंडनच्या हिथ्रो विमानतळावर नोकरीची संधी मिळाली होती. मात्र, नोकरीसाठी आवश्यक असलेल्या त्याच्या पूर्वीच्या पुणे येथील महाविद्यालयाच्या प्रमाणपत्राच्या तपासणीसाठी (Verification) महाविद्यालयाने ‘जात’ विचारली, असा गंभीर आरोप आहे. ॲड. प्रकाश आंबेडकर यांनी आपल्या ‘X’ हँडलवर ट्विट करत हा प्रकार उघडकीस आणला. विशेष म्हणजे, प्रेम जेव्हा लंडनला शिक्षणासाठी गेला होता, तेव्हा याच महाविद्यालयाने त्याचे प्रमाणपत्र तपासणी करून दिले होते. परंतु, आता नोकरीसाठी पुन्हा त्याच प्रमाणपत्राची मागणी झाल्यावर महाविद्यालयाने नकार दिला आहे.”प्राचार्यांच्या राजकीय संबंधांवर ॲड. आंबेडकरांचे बोट” मॉडर्न कॉलेज ऑफ आर्ट्स, सायन्स अँड कॉमर्सच्या प्राचार्या डॉ. निवेदिता गजानन एकबोटे आहेत. त्या भाजपची युवा शाखा असलेल्या भारतीय जनता युवा मोर्चाच्या महाराष्ट्र उपाध्यक्षा म्हणूनही कार्यरत आहेत. ॲड. प्रकाश आंबेडकर यांनी त्यांच्या या राजकीय आणि वैचारिक संबंधांवर लक्ष वेधत, त्यांच्या या कृतीमागे जातीय पूर्वग्रह असल्याचा थेट आरोप केला आहे. ॲड. आंबेडकर म्हणाले, “मनूवादी भाजपशी त्यांचा (प्राचार्यांचा) राजकीय आणि वैचारिक संबंध पाहता, त्यांच्या शैक्षणिक कारकिर्दीत अनुसूचित जाती (SC), अनुसूचित जमाती (ST) आणि इतर मागासवर्गीय (OBC) विद्यार्थ्यांविरुद्ध जातीय पूर्वग्रहाने त्यांच्या कृतींना किती आकार दिला असेल याची कल्पना आपण करू शकतो. “जातीय भेदभावाचे ज्वलंत उदाहरण” प्रेम बिऱ्हाडेचे हे प्रकरण म्हणजे सामाजिक आणि आर्थिक अडथळे पार करून आंतरराष्ट्रीय स्तरावर यश मिळवलेल्या एका होतकरू तरुणाला केवळ त्याच्या ‘जाती’मुळे नोकरी गमवावी लागल्याचे ज्वलंत उदाहरण आहे.ॲड. प्रकाश आंबेडकर यांनी या प्रकरणाकडे तातडीने लक्ष देण्याची आणि जबाबदारी निश्चित करण्याची मागणी केली आहे. प्रेमची ही कथा जातीय भेदभावामुळे महत्त्वाकांक्षा चिरडल्या गेलेल्या असंख्य दलित विद्यार्थ्यांची कथा असल्याचे त्यांनी म्हटले आहे. या गंभीर आरोपांवर मॉडर्न कॉलेज ऑफ आर्ट्स, सायन्स अँड कॉमर्स किंवा प्राचार्या डॉ. निवेदिता गजानन एकबोटे यांच्याकडून अद्याप कोणतीही अधिकृत प्रतिक्रिया आलेली नाही.
