केज (बीड):
देशातील प्रतिष्ठित शिक्षण संस्था असलेल्या ‘आयआयटी बॉम्बे’ (IIT Bombay) येथील गुणवंत विद्यार्थी साहिल वाकोडे याच्या आत्महत्या प्रकरणाची उच्चस्तरीय व निष्पक्ष चौकशी करण्यात यावी आणि दोषींवर कठोर कायदेशीर कारवाई करावी, या मागणीसाठी ‘दलित अन्याय अत्याचार निर्मूलन समिती, केज’ यांच्या वतीने तहसीलदार कार्यालयात निवेदन सादर करण्यात आले.
बुद्धिमत्तेच्या जोरावर मिळवला होता प्रवेश
तहसीलदारांना दिलेल्या निवेदनात नमूद करण्यात आले आहे की, साहिल वाकोडे हा अत्यंत हुशार आणि गुणवंत विद्यार्थी होता. स्वतःच्या बुद्धिमत्ता, गुणवत्ता आणि कष्टाच्या जोरावर त्याने देशातील नामांकित आयआयटी बॉम्बेमध्ये शिक्षण घेण्याची संधी मिळवली होती. मात्र, त्याच्या आत्महत्येच्या धक्कादायक घटनेमागे संस्थेतील कथित जाचक वातावरण, मानसिक छळ तसेच जातीय भेदभावाचे आरोप समोर येत आहेत. या संपूर्ण प्रकरणाचे सत्य निष्पक्ष व सखोल चौकशीनंतरच बाहेर येणे अत्यंत गरजेचे आहे.
प्रमुख मागण्या:
साहिल वाकोडे याच्या आत्महत्या प्रकरणाची निष्पक्ष, सखोल व उच्चस्तरीय चौकशी करण्यात यावी.
विद्यार्थ्याला मानसिक किंवा जातीय छळाला सामोरे जावे लागले असल्यास, चौकशीत निष्पन्न होणाऱ्या संबंधित प्राध्यापक, अधिकारी अथवा जबाबदार घटकांवर तात्काळ कठोर कायदेशीर गुन्हे दाखल करून कारवाई करण्यात यावी.
अशा दुर्दैवी घटना भविष्यात घडू नयेत यासाठी उच्च शैक्षणिक संस्थांमध्ये विद्यार्थ्यांच्या सुरक्षेसाठी व भेदभावरहित वातावरणासाठी ठोस उपाययोजना राबवण्यात याव्यात.
आंदोलनाचा इशारा
शासनाने व प्रशासनाने या प्रकरणाचे गांभीर्य ओळखून तात्काळ योग्य ती कारवाई करावी, अन्यथा ‘दलित अन्याय अत्याचार निर्मूलन समिती’च्या वतीने लोकशाही आणि सनदशीर मार्गाने तीव्र आंदोलन छेडण्यात येईल, असा इशाराही या निवेदनाद्वारे देण्यात आला आहे. सदर निवेदनाची प्रत केज तहसील कार्यालयातील आवक-जावक विभागाकडे अधिकृतरीत्या सुपूर्द करण्यात आली आहे.
