नांदेड:
राज्यात स्थानिक स्वराज्य संस्थांच्या निवडणुकांचे बिगुल वाजले असतानाच नांदेडमध्ये प्रचाराच्या पातळीने खालची पातळी गाठल्याचा आरोप होत आहे. भाजप नेते अशोक चव्हाण यांच्या प्रचारासाठी लावण्यात आलेल्या एका वादग्रस्त पोस्टरमुळे आता नवा वाद उफाळून आला असून, वंचित बहुजन आघाडीने याप्रकरणी आक्रमक पवित्रा घेतला आहे.
नेमका वाद काय?
नांदेड महानगरपालिका निवडणुकीच्या पार्श्वभूमीवर शहरात भाजपच्या वतीने काही पोस्टर्स लावण्यात आले आहेत. या पोस्टरवर “रोज खा मटन आणि भाजपचं दाबा बटन. एकीकडे मटन खाऊन दुसऱ्याला मतदान अशी मनधाड करू नका” असा मजकूर छापण्यात आला आहे. या वाक्यामुळे मतदारांमध्ये संभ्रम आणि नाराजी व्यक्त केली जात आहे.
वंचित बहुजन आघाडीची आक्रमक भूमिका
या प्रकाराची गंभीर दखल घेत वंचित बहुजन आघाडीचे राज्य प्रवक्ते ॲड. डॉ. अरुण जाधव यांनी राज्य निवडणूक आयोगाकडे लेखी तक्रार दाखल केली आहे. त्यांनी आपल्या तक्रारीत खालील प्रमुख मुद्दे मांडले आहेत:
धार्मिक भावनांना धक्का: अशा प्रकारच्या भाषेमुळे विशिष्ट समाजाच्या धार्मिक भावना दुखावल्या जाऊ शकतात.
आचारसंहितेचे उल्लंघन: निवडणूक प्रचारात खाद्यसंस्कृतीचा आधार घेऊन मतदारांवर दबाव टाकणे किंवा दिशाभूल करणे हा आचारसंहितेचा भंग आहे.
लोकशाही मूल्यांचा ऱ्हास: मतदारांना ‘धमकीसदृश’ किंवा ‘प्रलोभन दाखवणारे’ संदेश देणे लोकशाहीसाठी घातक आहे.
कारवाईची मागणी
”निवडणूक जिंकण्यासाठी भाजपकडून अशा खालच्या स्तरावरील भाषेचा वापर केला जात आहे. समाजात तेढ निर्माण करणाऱ्या या वक्तव्याबद्दल अशोक चव्हाण आणि संबंधित भाजप पदाधिकाऱ्यांवर कठोर कारवाई व्हावी,” अशी मागणी ॲड. डॉ. अरुण जाधव यांनी केली आहे.
राजकीय वर्तुळात खळबळ या तक्रारीनंतर नांदेडच्या राजकीय वर्तुळात मोठी खळबळ उडाली आहे. आता निवडणूक आयोग या पोस्टर प्रकरणाची चौकशी करून भाजपवर काय कारवाई करणार, याकडे सर्वांचे लक्ष लागले आहे. या वादाचा परिणाम मतदानावर होणार की भाजप यावर आपली बाजू स्पष्ट करणार, हे पाहणे महत्त्वाचे ठरेल.
