जालना/अंबड: अंबड तालुक्यातील स्थानिक स्वराज्य संस्थेत मोठा बदल घडवत राज्य शासनाने बनगाव ग्रामपंचायतीचे विभाजन करण्याचा ऐतिहासिक निर्णय घेतला आहे. ग्रामविकास विभागाने २० ऑक्टोबर २०२४ रोजी जारी केलेल्या असाधारण अधिसूचनेनुसार, बनगावमधून वेगळे झालेल्या दहिगव्हाण (खु.) सोबत बेलगाव या महसुली गावाचा समावेश करून ‘दहिगव्हाण (खु.)–बेलगाव’ या नावाने एक नवीन स्वतंत्र ग्रामपंचायत स्थापन करण्यात आली आहे.
प्रशासकीय गतिमानता
शासनाचे उपसचिव क. श्री. पोतदार यांच्या स्वाक्षरीने हा आदेश निर्गमित झाला असून, जिल्हाधिकारी आशिमा मित्तल आणि मुख्य कार्यकारी अधिकारी मिन्नू पी. एम. यांनी या पुनर्रचना प्रक्रियेचा पाठपुरावा केला. मुख्य कार्यकारी अधिकारी मिन्नू पी. एम. यांनी अंबड तहसीलदार व गटविकास अधिकारी यांना तातडीने अंमलबजावणीचे निर्देश दिले आहेत. या प्रक्रियेत अशोक रंगनाथ शिंदे यांचे अथक प्रयत्न आणि ग्रामसेवक श्री. पगारे यांचे प्रशासकीय सहकार्य महत्त्वपूर्ण ठरले.
बदललेली रचना
या पुनर्रचनेमुळे भौगोलिक कार्यक्षेत्राचे विभाजन झाले असून, आता नवीन रचना खालीलप्रमाणे असेल:
बनगाव ग्रामपंचायत: यापुढे फक्त बनगाव महसुली गाव समाविष्ट राहील.
दहिगव्हाण (खु.) ग्रामपंचायत: यात दहिगव्हाण (खु.) आणि बेलगाव ही दोन गावे सामील करण्यात आली आहेत.
नागरिकांना मोठा दिलासा
या बदलामुळे बेलगाव आणि दहिगव्हाण खुर्द येथील नागरिकांना मोठा दिलासा मिळाला आहे. पूर्वी प्रशासकीय कामांसाठी त्यांना लांब असलेल्या बनगाववर अवलंबून राहावे लागत होते, मात्र आता दहिगव्हाण (खु.) येथेच ग्रामपंचायतीचे कामकाज सुकर होणार आहे. दोन्ही गावे जवळ आल्याने विकासकामे अधिक परिणामकारक होतील, असा विश्वास प्रशासनाने व्यक्त केला आहे.
२० ऑक्टोबर २०२४ पासून ही रचना अमलात आली असून, जिल्हा प्रशासनाकडून लवकरच मतदारयादी विभाजन आणि नवीन ग्रामपंचायत निवडणुकीची प्रक्रिया सुरू होणार आहे.
