परभणी: जन आक्रोश मोर्चा’नंतर सोशल मीडियावर तेढ निर्माण करण्याचा प्रयत्न; वंचितच्या कार्यकर्त्यांची तक्रार. वंचित बहुजन आघाडीचे प्रमुख बाळासाहेब आंबेडकर आणि त्यांचे चिरंजीव सुजात आंबेडकर यांच्याबद्दल सोशल मीडियावर बदनामीकारक आणि मानहानीकारक पोस्ट टाकल्याप्रकरणी परभणी जिल्ह्यातील पाथरी पोलीस ठाण्यात चौघांविरुद्ध गुन्हा दाखल करण्यात आला आहे. औरंगाबाद येथे २४ ऑक्टोबर २०२५ रोजी वंचित बहुजन आघाडीने राष्ट्रीय स्वयंसेवक संघाच्या (RSS) कार्यालयावर ‘जन आक्रोश मोर्चा’ काढल्यानंतर हा प्रकार घडला आहे. काय आहे प्रकरण? वंचित बहुजन आघाडी आणि आंबेडकरी चळवळीतील कार्यकर्त्यांनी दिलेल्या तक्रारीनुसार, आरएसएसशी संबंधित काही व्यक्तींनी सोशल मीडियावर बनावट (फेक) फेसबुक अकाऊंट्सचा वापर केला. या अकाऊंट्सवरून बाळासाहेब आंबेडकर आणि सुजात आंबेडकर यांच्याबद्दल अपशब्द आणि मानहानीकारक कमेंट्स व प्रतिक्रिया देण्यात आल्या. कार्यकर्त्यांनी आक्षेप घेतला की, फेसबुकवर अर्वाच्च भाषेत पोस्ट आणि कमेंट्स करून समाजात सामाजिक तेढ निर्माण करण्याचा प्रयत्न करण्यात आला आहे.या चौघांवर गुन्हा दाखल: वंचित बहुजन आघाडीच्या कार्यकर्त्यांनी आक्षेपार्ह पोस्ट करणाऱ्या प्रताप आमले, शिवम सरपोतदार, अण्णासाहेब जगदाळे आणि भाऊ जगदाळे या चार जणांवर त्वरित गुन्हा दाखल करण्याची मागणी केली होती.या मागणीसाठी कार्यकर्त्यांनी पाथरी पोलीस निरीक्षक आणि तहसील कार्यालयात निवेदन दिले होते. या निवेदनाची गंभीर दखल घेऊन, पाथरी पोलीस स्टेशन येथे संबंधित आरोपींवर कायदेशीररित्या गुन्हा दाखल करण्यात आला आहे. यावेळी तालुक्यातील वंचित बहुजन आघाडीचे आणि आंबेडकरी चळवळीतील असंख्य कार्यकर्ते मोठ्या संख्येने उपस्थित होते. पोलिसांनी आता या चारही आरोपींचा तपास सुरू केला आहे.
