पत्रकार बांधव आणि सामाजिक कार्यकर्त्यांच्या उपस्थितीत कार्याचा गौरव; वंचित-बहुजनांच्या प्रश्नांवर लढण्याची घेतली ग्वाही
केज | प्रतिनिधी
दलित चळवळीतील झुंजार नेतृत्व आणि समाजातील वंचित घटकांसाठी सदैव धावून जाणारे सक्रिय सामाजिक कार्यकर्ते अशोक गायकवाड यांचा वाढदिवस केज येथे मोठ्या उत्साहात साजरा करण्यात आला. या निमित्ताने आयोजित स्नेहसोहळ्याला केज तालुक्यातील पत्रकार, विविध संघटनांचे पदाधिकारी आणि मित्रपरिवाराने मोठी गर्दी केली होती.
अशोक गायकवाड यांच्या वाढदिवसाचे औचित्य साधून केज तालुक्यातील पत्रकार बांधवांनी एकत्र येत त्यांच्या कार्याचे कौतुक केले. यावेळी ज्येष्ठ पत्रकार चंद्रकांत पाटील, नंदूलाल मिसाळ, लिंबराज गायकवाड, विजय बिक्कड, रणजित घाडगे, राम ढवळे, संपत सोनवणे, किरण आचार्य, सचिन गायकवाड, पांडुरंग कसबे, प्रदिप गायकवाड यांसह अनेक मान्यवर उपस्थित होते. लोकशाहीचा चौथा स्तंभ मानल्या जाणाऱ्या पत्रकारांनी गायकवाड यांच्या सामाजिक बांधिलकीचा गौरव करत त्यांना पुढील वाटचालीस शुभेच्छा दिल्या.
’अन्यायाविरुद्धचा आधारवड’
यावेळी उपस्थित मित्रपरिवाराने अशोक गायकवाड यांच्याबद्दल आपल्या भावना व्यक्त केल्या. “केवळ वाढदिवस साजरा करणे हा उद्देश नसून, समाजासाठी झटणाऱ्या व्यक्तीच्या पाठीशी उभे राहणे ही आमची जबाबदारी आहे,” असे मत व्यक्त करण्यात आले. गायकवाड यांनी दलित चळवळीत स्वतःला झोकून दिले असून, तालुक्यातील दलित, वंचित आणि बहुजन समाजावर कुठेही अन्याय झाला, तर ते शासन-प्रशासनाकडे पाठपुरावा करून संबंधितांना न्याय मिळवून देण्यासाठी अहोरात्र कष्ट घेतात, असे गौरवोद्गार यावेळी काढण्यात आले.
शाल आणि पुष्पहाराने सन्मान
कार्यक्रमाच्या शेवटी अशोक गायकवाड यांचा शाल, श्रीफळ आणि पुष्पहार देऊन यथोचित सत्कार करण्यात आला. समाजात न्याय, समता आणि बंधुत्वाची विचारधारा अधिक प्रखरपणे रुजवण्यासाठी त्यांचे कार्य भविष्यातही असेच व्यापक होत राहो, अशी सदिच्छा उपस्थितांनी व्यक्त केली. वाढदिवसानिमित्त झालेल्या शुभेच्छांच्या वर्षावाने अशोक गायकवाड भारावून गेले होते.
