येवता/लाईव्ह अशोका टाईम्स (प्रतिनिधी):
येथील माध्यमिक शाळा, येवता.ता.केज (जिल्हा परिषद शाळा परिसर) मध्ये इयत्ता दहावीच्या विद्यार्थ्यांसाठी विश्वरत्न युवा प्रतिष्ठान च्या वतीने एका विशेष कार्यक्रमाचे आयोजन करण्यात आले होते. आगामी बोर्ड परीक्षेच्या पार्श्वभूमीवर, विद्यार्थ्यांना प्रोत्साहन देण्यासाठी आणि त्यांच्या अभ्यासाला गती देण्यासाठी मोफत परीक्षा पॅड (Writing Pad), स्केल पट्टी आणि पेन संचाचे वाटप करण्यात आले. 
शाळेच्या प्रांगणात आयोजित या कार्यक्रमात प्रतिष्ठानच्या पदाधिकाऱ्यांनी विद्यार्थ्यांशी संवाद साधला. बोर्डाच्या परीक्षेला सामोरे जाताना येणारा ताण कमी करून आत्मविश्वासाने पेपर कसे लिहावे, याबाबत विद्यार्थ्यांना मार्गदर्शन करण्यात आले.ग्रामीण भागातील अनेक गुणवंत विद्यार्थ्यांना या साहित्याचा मोठा आधार मिळणार आहे. यावेळी शाळेतील विद्यार्थीनींच्या हाती छत्रपती शिवाजी महाराजांचे चित्र असलेले आकर्षक परीक्षा पॅड आणि इतर साहित्य सुपूर्द करण्यात आले. साहित्याचा दर्जा पाहून विद्यार्थ्यांनी आणि शिक्षकांनी प्रतिष्ठानचे आभार मानले.
यावेळी विश्वरत्न युवा प्रतिष्ठानचे सुरज काळे व इतर पदाधिकारी, शाळेचे शिक्षक वृंद आणि गावातील प्रतिष्ठित नागरिक उपस्थित होते.या वेळी विश्वरत्न प्रतिष्ठान च्या कार्यकर्त्याच्या हस्ते विद्यार्थी व विद्यार्थिनींना हे साहित्य प्रदान करण्यात आले.
सामाजिक बांधिलकीची जोपासना
”केवळ शिक्षण घेणे महत्त्वाचे नसून, शिक्षणासाठी लागणारी साधने वेळेवर उपलब्ध होणेही गरजेचे आहे. ग्रामीण भागातील एकही विद्यार्थी साहित्याअभावी मागे राहू नये, हीच आमची भावना आहे,” असे मत राहुल काळे यांनी प्रतिष्ठानच्या वतीने व्यक्त करण्यात आले.
