बीड | दि. ७ जानेवारी २०२६:
जिद्द, चिकाटी आणि कष्टाच्या जोरावर ग्रामीण भागातील खेळाडू आपले नाव सुवर्ण अक्षरात कोरीत आहेत. अंबाजोगाई येथे नुकत्याच पार पडलेल्या जिल्हास्तरीय दिव्यांग क्रीडा स्पर्धेत, बीड येथील निवासी मतिमंद विद्यालय (वासनवाडी फाटा) ची विद्यार्थिनी स्नेहा शहादेव वाणी हिने गोळा फेक स्पर्धेत उत्कृष्ट कामगिरी करत प्रथम क्रमांक पटकावला आणि सुवर्णपदकावर आपले नाव कोरले.
दिग्गजांच्या उपस्थितीत शुभारंभ
या स्पर्धेचा शुभारंभ दिव्यांग कल्याण मंत्रालयाचे राज्य उपाध्यक्ष डॉ. संतोष मुंडे यांच्या हस्ते करण्यात आला. यावेळी बीडचे जिल्हाधिकारी विवेक जॉन्सन,मुख्यकार्यकारी अधिकारी जितीन रहमान, अप्पर जिल्हाधिकारी अश्विनी जरांगे(सोनवणे)मॅडम, एस.डी.ओ (SDO) दीपक वजाळे यांसह अनेक प्रशासकीय अधिकारी उपस्थित होते. या मान्यवरांनी स्नेहाच्या कामगिरीचे विशेष कौतुक केले.
अटीतटीची लढत आणि स्नेहाची झेप
या जिल्हास्तरीय स्पर्धेत जिल्ह्यातील अनेक नामवंत खेळाडूंनी सहभाग घेतला होता. मात्र, स्नेहाने सुरुवातीपासूनच दाखवलेला आत्मविश्वास आणि सरावाच्या बळावर फेकलेल्या गोळ्याच्या अंतरापुढे सर्व स्पर्धक फिके पडले. स्नेहाने मिळवलेल्या या यशामुळे तिचे सर्व स्तरांतून अभिनंदन होत आहे.
शाळा आणि कुटुंबाचा अभिमानस्नेहाच्या या यशाचे श्रेय तिचे वडील शहादेव वाणी, शाळेचे मुख्याध्यापक श्री. शिंदे व्ही. पी. आणि क्रीडा शिक्षक श्री. डोंगरे सर यांना दिले जात आहे. एका मध्यमवर्गीय कुटुंबातून येऊन, शारीरिक मर्यादांवर मात करत स्नेहाने मिळवलेले हे यश दिव्यांग विद्यार्थ्यांसाठी प्रेरणादायी ठरणार आहे.
