बीड: तंत्रज्ञानाच्या युगात विद्यार्थ्यांच्या कल्पकतेला वाव देण्यासाठी शासकीय तंत्रनिकेतन, बीड येथे आयएसटीई (ISTE) स्टुडंट चॅप्टरच्या सहकार्याने ‘संस्था स्तरीय पोस्टर स्पर्धा २०२६’ चे आयोजन करण्यात आले आहे. ही स्पर्धा १७ जानेवारी २०२६ रोजी सकाळी ११:३० ते दुपारी १:३० या वेळेत पार पडणार आहे.
यावर्षी स्पर्धेसाठी ‘आर्टिफिशियल इंटेलिजन्स’ (कृत्रिम बुद्धिमत्ता) हा अत्यंत महत्त्वपूर्ण विषय निवडण्यात आला आहे. सहभागी विद्यार्थ्यांना त्यांचे कौशल्य दाखवण्यासाठी ‘A2’ आकाराच्या ड्रॉईंग शीटवर स्वतः तयार केलेले पोस्टर सादर करावे लागेल. निवड समितीद्वारे उत्कृष्ट ठरणाऱ्या पहिल्या तीन पोस्टर्सची निवड करण्यात येईल.
भरघोस बक्षिसे:
स्पर्धेतील विजेत्यांना रोख स्वरूपात बक्षिसे व प्रमाणपत्रे देऊन गौरविण्यात येणार आहे. यात प्रथम क्रमांकास २००० रुपये, द्वितीय क्रमांकास १५०० रुपये, तर तृतीय क्रमांकास १००० रुपये अशी पारितोषिके देण्यात येतील.
नोंदणीची माहिती:
इच्छुक विद्यार्थ्यांनी या स्पर्धेसाठी १२ जानेवारी २०२६ पर्यंत आपली नोंदणी करणे आवश्यक आहे. या उपक्रमाच्या यशस्वीतेसाठी प्राचार्य डॉ. वाघमारे ए.के. यांच्या मार्गदर्शनाखाली विविध विभागांचे समन्वयक प्रयत्नशील आहेत. यात श्री. गिट्टे बी.एम., श्री. गुट्टे पी.एच., श्रीमती वावरे ए.यू., श्री. शेख आय.टी., श्री. गावडे पी.बी., श्री. आठवले आर.सी. आणि श्री. करवर डी.बी. या समन्वयकांचा समावेश आहे. जास्तीत जास्त विद्यार्थ्यांनी या स्पर्धेत सहभागी व्हावे, असे आवाहन संस्थेमार्फत करण्यात आले आहे.
