याप्रकरणाची पुढील सुनावणी आता ७ मे रोजी होणार
बीड प्रतिनिधी-अनंत जाधव
राज्यात नव्हे तर देशात गाजलेल्या बीड मधील मस्साजोग गावचे दिवंगत सरपंच संतोष देशमुख यांच्या हत्या प्रकरणाची सुनावणी दि.२२ एप्रिल रोजी बीडच्या विशेष मकोका कोर्टात पार पडली. या सुनावणीदरम्यान आरोपींची उपस्थिती व्हिडिओ कॉन्फरन्सिंगद्वारे लावण्यात आली होती. या प्रकरणाची पुढील सुनावणी आता ७ मे रोजी होणार असून, कोर्टातील घडामोडींसोबतच धनंजय देशमुख यांनी माध्यमांशी साधलेला संवाद सध्या चर्चेचा विषय ठरत आहे. सुनावणीदरम्यान आरोपी विष्णू चाटे याच्या वतीने कोर्टात ‘जीपीए’ साठी अर्ज दाखल करण्यात आला आहे. गाडीचे हप्ते भरणे आणि लोकांची देणी देण्यासाठी बँक खात्यातील व्यवहारांचे अधिकार मिळावेत, अशी मागणी आरोपीने केली आहे. यावर फिर्यादी पक्षाच्या वतीने पुढील सुनावणीत म्हणणे मांडले जाणार आहे.
तसेच, या प्रकरणातील महत्त्वाचा तांत्रिक पुरावा असलेल्या पेन ड्राईव्हमधील ५९ सेकंदांच्या फाईलबाबतही कोर्टात चर्चा झाली. लॅपटॉपमधून जो डेटा रिकव्हर झाला आहे, तोच पुरावा म्हणून ग्राह्य धरला जाईल, असे लेखी स्वरूपात देण्यात आले आहे. मात्र, आरोपींचे वकील मुद्दाम खोडा घालून तारीख लांबवण्याचा प्रयत्न करत असल्याचा आरोप धनंजय देशमुख यांनी केला.
राजकारण दुय्यम, भावाला न्याय मिळवून देणे हेच ध्येय एकीकडे मस्साजोगमध्ये सरपंच पदाच्या निवडणुकीचा प्रचार शिगेला पोहोचला असताना, धनंजय देशमुख यांनी प्रचार सोडून कोर्टातील सुनावणीला उपस्थित राहणे पसंत केले. माध्यमांशी बोलताना ते म्हणाले, माझ्यासाठी राजकारण दुय्यम असून भावाला आणि गावाला न्याय मिळवून देणे हीच माझी प्राथमिकता आहे. मला राजकारण करायचे असते, तर मी स्वतः निवडणुकीला उभा राहिलो असतो. या सुनावणीमुळे आणि देशमुखांच्या राजकीय भूमिकेमुळे संपूर्ण बीड जिल्ह्याचे लक्ष आता ७ मे च्या सुनावणीकडे आणि २८ तारखेच्या निकालाकडे लागले आहे.
स्वरूपानंद देशमुख यांच्यावर टीका
निवडणुकीच्या रिंगणात असलेले स्वरूपानंद देशमुख यांच्यावर भाष्य करताना धनंजय देशमुख यांनी स्पष्ट केले की, त्यांच्या बोलण्याकडे मी लक्ष देत नाही. माझ्या कुटुंबावर कोणीही बोलण्याचा प्रयत्न करू नये. माझ्या भावाने दलित बांधवांसाठी प्राणाची आहुती दिली आहे. पीडित कुटुंबाबद्दल बोलणे हे कितपत उचित आहे, याचे भान ज्याला त्याला असले पाहिजे, असेही ते म्हणाले.
२९ तारखेला मोठा खुलासा ?
निवडणुकीत स्वरूपानंद देशमुख यांना नक्की कोणी उभे केले आणि त्यांना कोणाचा पाठिंबा आहे, याचे सर्व स्पष्टीकरण २८ तारखेच्या मतदानानंतर म्हणजेच २९ एप्रिल रोजी देणार असल्याचे संकेत धनंजय देशमुख यांनी दिले आहेत. येणाऱ्या ८-१० दिवसांत सर्व उत्तरे मिळतील, सध्या यावर जास्त चर्चा करणे उचित नाही, असे म्हणत त्यांनी सस्पेन्स कायम ठेवला आहे.
