केज/होळ (प्रतिनिधी) :
बुलढाणा येथे क्रांतीकारी शेतकरी संघटनेचे संस्थापक अध्यक्ष रविकांत तुपकर यांच्या सुरू असलेल्या बेमुदत अन्नत्याग आंदोलनाला पाठिंबा देण्यासाठी आणि शेतकऱ्यांच्या रखडलेल्या मागण्यांकडे शासनाचे लक्ष वेधण्यासाठी केज तालुक्यात आंदोलन तीव्र झाले आहे. क्रांतीकारी शेतकरी संघटनेचे जिल्हाध्यक्ष कुलदीप करपे यांच्या नेतृत्वाखाली आज १७ जून रोजी सकाळी ठीक ११ वाजता बीड-अंबाजोगाई-लातूर महामार्गावरील होळ येथे ‘चक्काजाम’ आंदोलन करण्यात आले. शेतकऱ्यांच्या या आक्रमक पवित्र्यामुळे महामार्गावरील वाहतूक तब्बल एक तास पूर्णपणे ठप्प झाली होती.
कालच (१६ जून) केज तहसील कार्यालयासमोर आंदोलकांनी टायर जाळून सरकारचा निषेध केला होता. या घटनेला २४ तास उलटत नाहीत तोच, आज शेकडो शेतकऱ्यांनी थेट महामार्गावर ठाण मांडल्याने प्रशासनाची चांगलीच धावपळ उडाली. या आंदोलनाला संभाजी ब्रिगेडचे जिल्हाध्यक्ष राहुल खोडसे यांनीही सक्रिय सहभाग नोंदवत जाहीर पाठिंबा दिला.
महामार्गावर वाहनांच्या लांबच लांब रांगा; घोषणांनी परिसर दणाणला
सकाळी ११ वाजल्यापासूनच होळ गावाजवळील राज्य महामार्गावर परिसरातील शेकडो शेतकरी एकत्र येण्यास सुरुवात झाली होती. पाहता पाहता शेतकऱ्यांनी महामार्गाचा ताबा घेतला आणि रस्त्यावर ठिय्या मांडला. अचानक झालेल्या या चक्काजाममुळे महामार्गाच्या दोन्ही बाजूंनी प्रवाशांची व मालवाहू वाहनांची मोठी कोंडी झाली आणि वाहनांच्या लांबच लांब रांगा लागल्या.
आंदोलक शेतकऱ्यांनी “शेतकरी जिंकणारच”, “अन्नदात्याला न्याय मिळालाच पाहिजे”, आणि “रविकांत भाऊ तुम आगे बढो, हम तुम्हारे साथ है” अशा घोषणा देत संपूर्ण परिसर दणाणून सोडला.
महसूल प्रशासनाला १० मागण्यांचे निवेदन; पोलिसांचा चोख बंदोबस्त
आंदोलनाची माहिती मिळताच महसूल प्रशासनाचे अधिकारी आणि पोलीस पथक घटनास्थळी दाखल झाले. क्रांतीकारी शेतकरी संघटनेचे जिल्हाध्यक्ष कुलदीप करपे यांच्या हस्ते प्रशासनाला शेतकऱ्यांच्या १० प्रमुख मागण्यांचे निवेदन सादर करण्यात आले.
आंदोलनादरम्यान कोणताही अनुचित प्रकार घडू नये यासाठी युसुफवडगाव पोलीस ठाण्याचे सहायक पोलीस निरीक्षक संदीप मांजरमे यांच्या मार्गदर्शनाखाली चोख पोलीस बंदोबस्त तैनात करण्यात आला होता. प्रशासनाने निवेदन स्वीकारल्यानंतर आणि शेतकऱ्यांच्या भावना शासनापर्यंत पोहोचवण्याचे आश्वासन दिल्यानंतर, १ तासाने हे आंदोलन शांततेच्या मार्गाने मागे घेण्यात आले. यानंतर वाहतूक पूर्ववत सुरू झाली.
⚠️ “गांधीगिरीने ऐकणार नसाल, तर भगतसिंगांचा मार्ग स्वीकारावा लागेल!” — कुलदीप करपे
आंदोलनकर्त्यांना संबोधित करताना जिल्हाध्यक्ष कुलदीप करपे यांनी सरकारला थेट आणि निर्वाणीचा इशारा दिला. ते म्हणाले, “काल आम्ही केज तहसीलसमोर टायर जाळून फक्त इशारा दिला होता. जर सरकारने शेतकऱ्यांच्या मागण्यांची तातडीने दखल घेतली नाही, तर उद्या सरकारची खुर्ची जळायला वेळ लागणार नाही. सरकार जर गांधीजींच्या शांततापूर्ण मार्गाने ऐकणार नसेल, तर आम्हाला शहीद भगतसिंगांचा क्रांतिकारी मार्ग अवलंबावा लागेल.”
पुढे बोलताना ते म्हणाले, “बुलढाण्यात रविकांत भाऊंचा जीव टांगणीला लागला आहे, पण सरकार ढिम्म आहे. सरकारने तातडीने महाराष्ट्रात सरसकट कर्जमाफी जाहीर करावी, २०२५ च्या खरीप हंगामासाठी हेक्टरी १७,५०० रुपये पीकविमा मंजूर करावा आणि अतिवृष्टी व दुष्काळग्रस्त शेतकऱ्यांना १०० टक्के नुकसान भरपाई द्यावी. मागण्या मान्य न झाल्यास हा लढा यापुढे अधिक तीव्र आणि हिंसक होऊ शकतो, ज्याची जबाबदारी सर्वस्वी शासनाची असेल.”
प्रमुख पदाधिकाऱ्यांची उपस्थिती
या चक्काजाम आंदोलनात क्रांतीकारी शेतकरी संघटनेचे तालुकाध्यक्ष दिलीप लोंढे, अतुल गवळी, सतीश शिंदे, हरिभाऊ आघाव, दिगंबर तपसे, पंडित शिंदे, सुनील कापरे, भारत धपाटे, सुग्रीव करपे, उमेश गायकवाड यांच्यासह संघटनेचे अनेक आजी-माजी पदाधिकारी, कार्यकर्ते आणि होळ परिसरातील शेकडो शेतकरी मोठ्या संख्येने उपस्थित होते.
